Parch naturel Scilier-Ciadenat

L raion de defendura ie nluegià tla Dolomites ozidenteles. L Scilier ie n massif de crëp mpusant y reprejentea cun si tores Santner y Euringer n simbol dl Südtirol. Ënghe l massif dl Ciadenat cun si lingia meifineda de ciampanii y pizes ie cunesciù dalonc sëura nosc cunfins ora. Una de chësta truepa pizes marcantes, l Ciadenat de Antermoia, arjonj nchinamei n’autëza de 3.002 m. Dl Parch naturel fejel nce pert i bòsc da mont de Sëuc, Fie y Dier coche nce la Val Ciamin.

L Parch naturel i pert dla Rë europeica de raions de defendura Natura 2000, che mira dantaldut ala defendura di habitat naturei y tan che naturei, ma nce di tieres y dla plantes salveres. La fundamëntes giuridiches per chësc proiet ie dat dala diretiva europeica per la fauna, la flora y i habitat y dala diretiva europeica per la defendura di uciei. La Provinzia de Bulsan à per chësc fin deliberà mesures de mantenimënt . Tlo giatëis i documënc plu mpurtanc che reverda i raions Natura-2000-singui.

Per l Parch naturel iel istituì n cunsëi de gestion che ie metù adum da reprejentanc y reprejentantes di chemuns raionalmënter nteressei, dala lies per la defendura dla natura, da n espert/na esperta tl ciamp dla scienzes natureles, da reprejentanc y reprejentantes dl’assoziazions di paures y da reprejentanc y reprejentantes dla repartizions de cumpetënza singules dl’aministrazion provinziela.