Infopoint Dolomites UNESCO Arpejon mundiela Zans

Dedoravia ie la strutura na cësa de mureda y lën cun n tët de scintles, dedite iela fata de peton y la linies desseniedes sun i parëies reprejentea la linies geologiches dla natura da mont che ie da udëi alalergia. Pusciblteies de se senté ju nvieia a sté de cà ntan che animazions filmiches sun scherm y videos conta dl se furmé di cuntinënc y dla forza mudelënta dla natura.

La mostra, che ie da udëi debant, prejentea la sistemazion dl’Arpejon mundiela Dolomites tla bela cumpania de plu de 200 d’autra lueges d’arpejon mundiela sun dut l mond. Da udëi iel po nce si spartizion nterna te nuef raions, che forma – duc adum – na lingia de cuntredes da mont uniches. Per milions d’ani, ntan chëi che l duminova tlo n iede la tiera fërma y pona l mer, à de pitli organisms menuc ma nce de majeri frabicà su chisc crëps de marueia, y la dlacia, l’ega y l vënt ti à pona dat l’ultima limeda – nchin al didancuei. 

La mostra nes mëina te curt tëmp tres i plu de 270 milions d’ani dl deventé de chësta cuntreda straurdenera de crëps y montes. I curëc ie testemons de na vita passeda. Pra la stazions singules iel de pitla chertes da pudëi tò pea cun prupostes de escurscions per scuvierjer la Dolomites dal pont d’ududa geologich. Ala fin dl percurs dla mostra dà la costruzion particulera dl tët la puscibltà de cialé, sciche tres na rola, sun l mond di crëps dedora. Canche n zapa ora dla frabica mëten n pe tl Parch naturel Puez-Odles y nsci nce tl’arpejon mundiela dla Dolomites.

Orden de cësa | Vijites dl Infopoint n segurëza