Cësa dl Parch naturel Puez-Odles

L obietif dla Cësa dl Parch naturel Puez-Odles ie chël de ti purté plu daujin la natura ai/ala vijitadëures y de i/les nvië a se fermé. Na imaja dal’aria, te chëla che n possa zapé ite, dà la puscibltà ala jënt de ti cialé al Parch naturel dala pruspetiva di uciei y giapé nsci mprescions detaliedes dla cuntreda.

Tl raion dla mostra “Pië ite i crëps” vala dla tematica prinzipela tl Parch naturel, uel dì dla geologia dla Dolomites. Tlo vëniel mustrà sortes defrëntes de pieres y strac reprejentatifs per l raion te si forma de manifestazion respetivamënter tipica.
La “Marueies dla natura” tl segondo partimënt pieta truepa lerch per scuviertes: coes de uciei, reproduzions de piedies, plumes, peves, corni – iust per n nunzië n valgunes.
L alpinism vën prejentà tl raion “Cuncuisté la montes”. Reinhold Messner, che ie zënzauter l alpinist plu cunesciù a livel mundiel y che vën propi da Funes, conta te n film curt de si esperienzes tla montes. L “chino dla montes” pieta n program fis dl di y dl’ena de produzions filmiches sun i parcs naturei dl Südtirol. Da udëi iel tla Cësa dl Parch naturel sambën nce l film nuef dl "Parch naturel Puez-Odles". Chësc ti prejentea ai/ala vijitadëures te beliscima secuenzes de imajes la particulariteies dl parch natural.

Orden de cësa | Vijita dla Cësa dl Parch naturel n segurëza

Vijitëde nce nosc Infopoint Dolomites UNESCO Arpejon mundiela Zans!