Parch natural Fanes-Senes-Braies

Da ti ciaré a chëstes pizes y a chisc parëis ërc á che che ti ciara gonot l’impresciun da ester te n raiun a chël che an stënta da ti rové pormez y olache ara ne vá nia da passé amesafora. Mo chëstes pizes y chisc parëis de crëp incertlëia y scona en realté n raiun dër ampl de munts y de planöres altes, da na morfologia y contrada dër desvalia, olache les munts de Fanes, Senes y Plätzwiese rapresentëia les perts plü importantes.

Tl raiun sot a sconanza él ince de plü lec. Le Lech de Braies, che respidlëia i gragn parëis de Sas dla Porta y le Lech de Toblach, che rapresentëia cun sü pra da parü sön l’ur meridional n ambiënt de vita important por tröc vicí dal’ega, alda pro i lec naturai plü conesciüs dl Südtirol.

A livel europeich alda le Parch natural pro la rëi di raiuns sot a sconanza “Natura-2000”, che á sciöche fin prinzipal la sconanza di ambiënc de vita, dles sorts de plantes y de tiers salvari. Les fondamëntes iuridiches por chësc proiet é dades dala diretiva europeica sön la fauna, la flora y le habitat y dala diretiva europeica sön la proteziun di vicí. La Provinzia de Balsan á porchël deliberé mosöres de mantignimënt. Chiló ciafëise i documënc plü importanc chereverda i singui raiuns Natura- 2000.

Por vigni parch natural vëgnel metü sö n comité d'aministraziun, che é metü adöm da rapresentanzes di comuns locai interessá, dales assoziaziuns de sconanza dla natöra, n espert/n'esperta de sciënzes naturales, rapresentanzes dles lies di paurs y de departimënc spezialistics dl'aministraziun provinziala.