Escurjiuns virtuales y propostes da jí sö por munt

1. proposta da jí sö por munt: Zans - Ju dla Crusc - Forcela de Furcia - Glatschalm - Zans

• Lunghëza: 12.838 m
• Deslivel Söpert: 850 m
• Deslivel Jöpert: 850 m
• Tëmp da jí: 4 h 25 m
• Sort de tru: sëmena n pü' ria

Zanser Alm (1.676 m) - Gampenalm (2.068 m) - Ütia Schlüter (2.303 m) - Ju dla Crusc (2.344 m) - Cresta de Juac (2.421 m) - Medalghes (2.294 m) - Tschantschenon (1.932 m) – Zanser Alm (1.676 m)
Da Santa Madalena demez él na strada sön la pert orografica dërta dl Rü de Funes che condüj sö dala plaza da parché de Zans (1.676 m), olach’al mët man l’escurjiun proponüda. Pian ia dala plaza da parché ti ván do al Rü de Kaserill (sëmena nr. 25) cina olach’al scomëncia le tru nr. 33, che condüj a man dërta sö sön la Gampenalm (2.068 m). An vá spo sö dala Ütia Schlüter (2.303 m) y inant cuntra le Ju dla Crusc (2.344 m). Da chiló ván inant sön l’altavia nr. 3 che coliëia la Forcela de Pütia y le Grup de Pöz (merscia 3/2). Naota ván cun prudënza ite y sö por n giarun cina sö dala cresta panoramica de Juac (2.421 m). Daimproia condüj la sëmena sö Medalghes (2.294 m) y sö dal Ju dla Crusc (2.294 m). Da chiló demez vára spo jö valgamia ërta y do da n’ora röion jö dales üties de Tschantschenon (1.932 m). An vá spo inant fora por la valada cina fora dala burcia olach’al se despartësc la strada forestala che condüj sön la Zanser Alm o sön la Gampenalm. Chiló i ván do al tru de Adolf-Munkel che vá ite y sö tres bosć y pra dala pert orografica ciampa dla valada, mo ma cina sö dala burcia olache le tru se despartësc por jí sö dala Glatschalm (1.907 m), che é jödapé dla cité de peres che s’á destaché dai parëis setentrionai dles Odles. Da dailó vëgnon indô derevers jö por n tru ërt che condüj tres bosć da ciers y pecios cina jö Zans.

Cherta   Toureninfo

2. proposta da jí sö por munt: Lungiarü - Ju dla Crusc - Göma - Lungiarü

• Lunghëza: 16.866 m
• Deslivel Söpert: 1.069 m
• Deslivel Jöpert: 1.069 m
• Tëmp da jí: 6 h 5 m
• Sort de tru: semëna da munt ria

Lungiarü (1.397 m) - Seres (1.568 m) - Ju dla Crusc (2.344 m) - Munt dla Crusc (2.300 m) - Ütia Schlüter (2.303 m) - Göma (2.106 m) - Lungiarü (1.397 m)

Defata sura le zënter da San Martin de Tor oj ite a man ciampa la strada che condüj a Lungiarü (1.397 m), da olach’al pëia ia le tru cun la merscia nr. 4 che condüj fora por pra sö dala vila de Seres (1.568 m) y a man ciampa cuntra le Ju dla Crusc (2.344 m). An se tëgn porchël a man ciampa y do le tru nr. 4 röion ti pra da munt sön la pert meridionala de Munt dla Crusc (2.300 m). An vá inant sö dal Ju dla Crusc y röia spo sö dala Ütia Schlüter (2.303 m). La secunda pert de nosta escurjiun va dal Ju dla Crusc cuntra nord devers dla Forcela de Pütia (merscia 4/35). Bele pro la pröma burcia ojon a man dërta sön les destenüdes de cortesc dla Munt dla Crusc. Do n tru che vá sö y jö röion spo indô pro le Rü de Seres y i pra de Cialneur. Zënza dificoltés röion sön Göma (2.106 m), olach’an á la piza de Pütia bel dant. Da dailó án apëna n’ora y mesa da rové jö zoruch a Lungiarü olach’an é piá ia.

Cherta   Toureninfo

3. proposta da jí sö por munt: Sëlva - Crespëina - Ütia de Pöz - Val - Sëlva

• Lunghëza: 15.922 m
• Deslivel Söpert: 595 m
• Deslivel Jöpert: 1.241 m
• Tëmp da jí: 5 h 30 m
• Sort de tru: semëna de munt ria

Sëlva (1.569 m) - Ju de Cier (2.465 m) - Ju de Crespëna (2.531 m) - Ju de Ciampac (2.359 m) - Ütia de Pöz (2.481 m) - Val Lungia - Sëlva (1.569 m)
Da Sëlva demez ván cun le lift de Dantercëpies cina sö sura Frara. An vá spo inant n toch sot les Pizes de Cier ia y an abina tosc le tru nr. 2 che vëgn dal Ju de Frara sö. Chësc tru se tira ite y sö por otes ërtes amesa na ciaolara de crëp cina sö dal Ju de Cier (2.465 m). Do n pice toch jöpert jö por i giaruns dla Val de Chedul condüj le tru sö dal Ju de Crespëna (2.531 m). Da chiló demez ván dlungia le Lech de Crespëna ia por rové spo sön le Ju de Ciampac (2.359 m). An vá inant dala pert ozidentala de Gherdenacia, olache le tru nr. 4 che vëgn da Calfosch sö y chël che vëgn dal Ju de Gherdenacia ca vá adöm. Te n’ora röion dal Ju de Ciampac ite dala Ütia de Pöz (2.481 m). Da dailó ván spo fora y jö te Val do le tru nr. 2/16 y do da plü o manco trëi ores röion jö dala staziun dl lift de Dantercëpies te Sëlva (1.638 m).

Cherta   Toureninfo

4. proposta da jí sö por munt: Urtijëi - Seceda - Ncisles - Ütia de Col Raiser - Urtijëi

• Lunghëza: 13.482 m
• Deslivel Söpert: 171 m
• Deslivel Jöpert: 1371 m
• Tëmp da jí: 3 h 40 m
• Sort de tru: sëmena de munt saurida

Urtijëi (1.254 m) - Secëda (2.457 m) - Ütia Troier (2.280 m) - Ncisles (2.046 m) - Ütia de Col Raiser (2.104 m) - Gamsbluthütte (1.952 m) - Sacun (1.566 m) - Urtijëi (1.235 m) Da Urtijëi demez ván cun le lift cina sön Secëda (2.457 m), le punt plü alt dl’escurjiun. Chiló án n panorama olach’an vëiga les munts, dala ciadëna zentrala dles Alpes cina les Dolomites meridionales y dal Ortler cina les Tofanes. Do le tru nr. 1 passon sot les pizes dles Odles y vá cina ia dala Ütia Troier (2.280 m) y inant cina pro le Lech de Iman. Dedô röion, passan tres la munt de Ncisles, sö Ncisles (2.046 m). Ara vá spo inant do le tru nr. 4 cina sön Col Raiser (2.125 m) y sö dala Ütia de Col Raiser (2.104 m) y inultima sö dala Gamsbluthütte (1.952 m). Da dailó ván inant, dagnora do la merscia nr. 4, fora por le Bosch de Frëines cina a Sacun (1.566 m) y spo derevers jö dala staziun dl lift a Urtijëi (1.254 m).

Cherta   Toureninfo