Punt d'informaziun sura les Dolomites Patrimone mondial UNESCO Zans

Dal 2018 inant - nü agn do che les Dolomites é gnüdes tutes sö tla lista dl Patrimone dla umanité por süa belëza paesajistica y süa importanza geologica y geomorfologica - él ite insom la Val de Funes, pro la plaza da parché da Zans, n infopoint sura les Dolomites Patrimone mondial UNESCO.

Defora é la strotöra curida jö da scianores, daite éra de petun y les linies söi parëis reprodüj les linies geologiches dla natöra y di crëps defora. Deplü posć da se senté inviëia a resté, tratan che monitors cun animaziuns y videos cunta dla formaziun di continënc y dles forzes che i dá forma ala natöra.

La mostra, che an pó odëi debann, mostra sciöche les Dolomites Patrimone mondial é integrades danter i bëgn 200 atri posć dl patrimone natural de döt le monn. Implü vëigon ince, sciöche les Dolomites Patrimone mondial instësses é strotorades te nü sistems, che forma adöm na seria straordinara de contrades de crëp. Te miliuns de agn, olache mer y tera se baratâ jö, a dër de pici, mo ince de gragn organisms costruí i crëps imponënc dles Dolomites. Dlacia, ega y vënt ti á dé la forma da al dedaincö.

L'esposiziun salta tres plü de 270 miliuns de storia de chësta contrada straordinara. Corëc testemoniëia la vita de tëmps passá. Pro valgönes staziuns ciafun chertes da tó para, cun propostes por escurjiuns da descurí la geologia dles Dolomites. La costruziun particolara dl tët pita, ala fin dla mostra, de odëi fora, sciöche tres n ro da ciaré lunc, fora söl panorama di crëps dl post. Da jí fora dl frabicat, passun ince sura le confin dl Parch natural ite y röia tles Dolomites Patrimone dla umanité.

Orars de daurida:
Da ma cina ai pröms de novëmber: dal mertesc ala sabeda, dales 9.30 ales 18.00;
messé y agost: davert vigni dé
dai 26 de dezëmber cina ala fin de merz: dal mertesc ala domënia, dales 10.00 ales 17.00;
tratan les vacanzes da Nadé y da Carlascé: davert vigni dé