Le conzet de parch natural te Südtirol

I parcs naturai é raiuns dër importanc por daidé sconé la natöra y la contrada, por l’inrescida, por la formaziun y l’educaziun ambientala. Ai pita cotan de poscibilités de contat diret cun la natöra. Le conzet di parcs se basëia sön n valgönes diretives scëmples y tleres:

1. I parcs naturai de Südtirol scona y mantëgn la biodiversité alpina, cun sü ambiënc, plantes y tiers.
2. Tres l’informaziun, l’educaziun ambientala y l’oferta spezifica de esperiënzes da vire diretamënter tla natöra, dëidon i vijitadus da odëi cun d’atri edli la natöra, porchël se comporti spo ince te na manira plü responsabla.
3. I parcs naturai tol ite munts altes, pastöres, pra y bosć; insediamënc permanënc ne fej indere nia pert dl raiun.
4. Al vëgn mantigní inant l’economia forestala y l’agricoltöra da munt do n prinzip de sostenibilité.
5. Al ne vëgn lascé pro degöna ativité da frabiché (ater co por les strotöres por l’economia forestala y l’agricoltöra), an ne pó nia mëte sö val’ sort de linies o condütes fora de tera, tó fora material fora de mineores o ciavares de giara, y an ne pó gnanca adoré l’ega di rüs o di lec por fins idroeletrics o industriai.