Parch natural Fanes-Senes-Braies

Escurjiuns virtuales y propostes da jí sö por munt

Ëise vëia da nes acompagné ti punc panoramics plü demorvëia di parcs naturai? Spo gnide ma para a fá n’escurjiun virtuala fora por nosta contrada naturala y culturala unica al monn. Chësta é indere ma la secunda dles döes poscibilités ch’an á por imparé da conësce nüsc parcs naturai. La miú é tres ciamó chëra da l’esploré instësc!

1. proposta da jí sö por munt Capanna Alpina - Ücia de Pederü

  • Lunghëza: 14.257 m
  • Deslivel Söpert: 622 m
  • Deslivel Jöpert: 805 m
  • Tëmp da jí: 4 h 10 m
  • Sort de tru: sëmena n pü' ria

Capanna Alpina (1729 m) - Col de Locia (2069 m) - Gran Fanes (2110 m) - Le de Limo (2159 m) - Ücia de Fanes (2060 m) - Le Piciodel (1820 m) - Ücia de Pederü (1544 m)

Pian ia dal zënter da San Ciascian, tolon la strada por Valparola y röia do da plü o manco trëi chilometri pro la burcia, olache la strada oj ite dala Capanna Alpina (1.729 m). Chiló lascion l’auto y tol le tru che condüj a man dërta dla ciavara dal saurun ia y ite dala Capanna Alpina. Do le tru nr. 11 ván spo inant tres i pecëis y i pici pra de Plan de Furcia. Da dailó pëiel ite y sö le tru plü ërt che condüj sön Col de Locia (2.069 m). Le toch de sëmena che vëgn do passa tres na fopa danter i crëps de Fanes, de Ciampestrin y de Conturines y röia cina söl Ju dal’Ega. Al vëgn spo ciamó n toch da plan tres la munt de Fanes y do da plü o manco trëi ores röion ite en Gran Fanes (2.110 m). Dedô vára ciamó n pice toch ite y sö cina sö dal Le de Limo, che é ince le punt plü alt dl’escurjiun. Do ch’an é rová jö dala Ücia de Fanes, ti ván do ala merscia nr. 7 che pëia ia dala ütia y condüj jö dal Le Piciodel. Canch’an röia jödapé dl puntun che vëgn dedô, se röia l’escurjiun a Pederü (1.548 m), iteinsom la Val dai Tamersc.

Cherta   Toureninfo

2. proposta da jí sö por munt Plätzwiese - Strudelkopf - Plätzwiese

  • Lunghëza: 9.887 m
  • Deslivel Söpert: 455 m
  • Deslivel Jöpert: 455 m
  • Tëmp da jí: 2 h 45 m
  • Sort de tru: sëmena de munt saurida

Plaza dai auti dla Plätzwiese (1976 m) - Ju dl Strudelkopf (2212 m) - Strudelkopf (2308 m) - Ütia Dürrenstein (2031 m) - Plaza dai auti dla Plätzwiese (1976 m)

Dala plaza dai auti dla Plätzwiese (1976 m) ván cina pro la ostaria dal medemo inom y spo inant do la sëmena nr. 40 devers dl Dürrenstein. Do da 20 menüc röion sön l’altavia nr. 3, olache an oj a man ciampa y tol la sëmena devers dla Ütia Dürrenstein. Püch dan la Ütia röion sön na strada forestala. Da chiló inant ti ván do al tru nr. 34 y röia spo tosc sön le Ju dl Strudelkopf (2212 m), da olach’an vëiga bele la crusc dla piza. Dala piza dl Strudelkopf (2308 m) pón odëi düc i crëps y les ciadënes incëria, sciöche les Dolomites de Le Sest, le Grup di Cadini, les Marmarole, le Grup dl Cristalo y dl Crëp Alt. Do ch’an é indô gnüs jö dala Ütia Dürrenstein (2031 m) röion danü sön la strada forestala, olache l’escurjiun á metü man. (D’isté pón ince lascé l’auto tla localité Brückele y jí sö dala ostaria Plätzwiese (1976 m) cun le bus de linia).

Cherta   Toureninfo

3. proposta da jí sö por munt incër le Sas dla Porta ia

  • Lunghëza: 15.714 m
  • Deslivel Söpert: 1.101 m
  • Deslivel Jöpert: 1.101 m
  • Tëmp da jí: 5 h 50 m
  • Sort de tru: sëmena de munt ria

Lech de Braies (1498 m) - Porta Sora al Forn (2392 m) - Ücia de Biella (2328 m) - Forcela de Riciogogn (2327 m) - Munt de Pecëi (1595 m) - Lech de Braies (1498 m)
Pian ia dala plaza dai auti (1498 m) dl Lech de Braies, ti van do ala sëmena nr. 1 - naota incër le lech, spo ite y sö danter destenüdes de barantli, cina ch’an röia sö dal „Nabiges Loch“. Defata do vëgnon fora dl bosch y do da trëi ores röion sö dala Porta Sora al Forn (2392 m). Püch dessot él la Ücia de Biella (2328 m). Da chiló inant ti ván do ala merscia nr. 23 passan fora por de beles pastöres da munt morjeles cina sö dala Forcela de Riciogogn (2327 m). Impröma ërt y spo tres demanco é le tru che condüj jö y fora por le Seitenbachtal romantich-salvare, cina jö dala Munt de Pecëi (1595 m), da olach’an röia indô derevers al punt olach’an ê piá ia.

Cherta   Toureninfo

4. proposta da jí sö por munt Pedraces - La Crusc - Sura Valgiarëi - Pedraces

  • Lunghëza: 10.381 m
  • Deslivel Söpert: 328 m
  • Deslivel Jöpert: 824 m
  • Tëmp da jí: 3 h 10 m
  • Sort de tru: sëmena de munt saurida

Pedraces (1340 m) - Staziun a munt dl lift (1836 m) - La Crusc (2043 m) - Sura Valgiarëi (1786 m) - Pedraces (1340 m)

An tol le lift cina la pröma staziun (1836 m), da olach’an vá spo inant a pe. Te na buna mesora röion sö La Crusc (2043 m) y dailó tolon le tru nr. 15 che condüj fora y jö por i pra megri y tömi d’Armentara. Canch’an röia sön la strada da tractor, ojon jö a man ciampa jö por le tru nr. 15A. Danter pra da munt n pü’ plü anuzá, mo tres ciamó ric de ciüfs, röion pro la proscima burcia, olach’an oj ciamó n iade jö a man ciampa. Sëgn ván por l’ultimo iade n pice toch söpert cuntra Pre Comun. Denanco pié fora y jö vëigon chiló na belëza de corusc demorvëia, che müda tres indô cun les sajuns. Belanfat sc’an vëiga anemones che florësc o bele desflorides, anzianes, lersc vërc o che se vist da d’altonn de n corú ros-cöce - chiló él dagnora bel. Tla fopa de Valacia passon dlungia n pice biotop ia (Sura Valgiarëi, 1786 m). Chi che ti ciara plü avisa vëiga ci vita ch’al é laite: da d’aisciöda fei i arosć y les crotes i üs, d’isté él plëgn de tatermandli de munt y insec che büsia. Le tru da gní da Valacia y Razuns fora y jö cina jö dal lüch de Cialaruns é dër plajor y nia massa lunch. Dal lüch da Cialaruns ván n pice toch do na strada da giara ia por abiné la strada nr. 7a che vëgn da La Crusc jö y röia jö a San Linert. Do da plü o manco 45 menüc röion indô derevers olache la jita á metü man.

Cherta   Toureninfo