Parch natural Fanes-Senes-Braies

Parch natural Fanes-Senes-Braies

Tl rëgn di tiers

Le Parch natural Fanes-Senes-Braies é gnü metü sö dl 1980 y tol ite n’area de incër 25.680 hectar. Le raiun de sconanza se sleria fora ti comuns de Badia, Braies, Toblach, La Val, Mareo y Valdaora. Les tëmples otes devers de Puster fej da confin setentrional dl parch, a vest confinëia les tëmples da bosch cuntra la Val Badia, a süd röiel cina sön le termo provinzial, le confin oriental é dé dant dales Dolomites de Le Sest cun la Val de Lander.

Da ti ciaré a chëstes pizes y a chisc parëis ërc á le vijitadú gonot l’impresciun d’ester te n raiun a chël ch’an stënta da ti rové pormez y olach’ara ne vá nia da passé amesafora. Mo chëstes pizes y chisc parëis de crëp incertlëia y scona en realté n raiun dër ampl de munts y de planöres altes, da na morfologia y contrada dër desvalia, olache les munts de Fanes, Senes y Plätzwiese rapresentëia les perts plü importantes.

Tl parch natural Fanes-Senes-Braies ciafon na contrada dolomitica tipica. La majera pert dl raiun mostra sö na geomorfologia complessa y á porchël na gran importanza scientifica. Les planöres altes de Fanes y Senes é caraterisades da formaziuns carsiches te dötes les formes poscibles: sales gaujades dal’erojiun, sfëntes, de mëndres y de maius ciaoles, ciaolares da dolines y andri. Tl raiun de sconanza él ince de plü lec. Le Lech de Braies, che respidlëia i gragn parëis de Sas dla Porta, y le Lech de Toblach, che rapresentëia cun sü pra tömi sön l’ur meridional n ambiënt de vita important por tröc vicí acuatics, alda pro i lec naturai plü conesciüs dl Südtirol.

A livel europeich alda le Parch natural pro la rëi di raiuns sot a sconanza „Natura-2000“ (link estern), che á sciöche fin prinzipal la sconanza di ambiënc de vita, dles sorts de plantes y de tiers salvari. Les fondamëntes iuridiches por chësc proiet é dades dala diretiva por la fauna, la flora y le habitat, conesciüda en cört sciöche diretiva FFH (92/43/EWG), y dala diretiva por la proteziun di vicí 2009/147/EF (79/409/EWG). Aladô dl articul 6, paragraf 1, dla diretiva por la fauna, la flora y le habitat, mëss i stac mëmbri fissé mosöres de mantignimënt por i raiuns „Natura-2000“. Le Südtirol á lascé lauré fora por chësc fin na sort de planns- management (link estern).

Plata dl Parch natural

Spersa25.453 ha
Deslivel1.929 m
Comuns
  • Toblach: 3.280 abitanc, spersa 12.633 hectar, pert dl parch natural 2.880 hectar
  • Braies: 632 abitanc, spersa 8.926 hectar, pert dl parch natural 6.920 hectar
  • Valdaora: 2.831 abitanc, spersa 4.895 hectar, pert dl parch natural 1.570 hectar
  • Badia: 3.080 abitanc, spersa 8.294 hectar, pert dl parch natural 1.980 hectar
  • Mareo: 2.706 abitanc, spersa 16.134 hectar, pert dl parch natural 10.950 hectar
  • La Val: 1.231 abitanc, spersa 3.903 hectar, pert dl parch natural 1.380 hectar
Istituí1980

Dolomites Patrimone mondial UNESCO

D’isté dl 2009 é les Dolomites gnüdes tutes sö tla lista dl patrimone mondial dl’UNESCO por la belëza de süa contrada straordinara y por süa importanza geomorfologica y geologica. Sön chësta lista röiel ma bëgns naturai o culturai unics, chiris fora cun cura y tuc sö deache ai á na gran importanza por la comunité internazionala. Ales Dolomites y insciö ince al Parch natural Fanes-Senes-Braies ti él gnü dé le majer reconescimënt odü dant por i bëgns naturai. N reconescimënt che se ghira ince n impëgn y na responsabilité particolara por ci che á da nen fá cun la sconanza y le svilup te n tëmp plü lunch de chësc raiun da munt straordinar.

Karte - Naturpark Fanes-Sennes-Prags

Ciasa dl parch natural

Ciasa dl parch natural Fanes-Senes-Braies
Strada Catarina Lanz 96
39030 Al Plan de Mareo
Tel.: +39 0474 506120
Fax: +39 0474 506585
E-mail: info.fsp@provinz.bz.it

Misciun...